Tgi che vegn relaschà dal servetsch militar duai vinavant pudair prender a chasa sia buis d'assagl u sia pistola d'ordonanza. Il Cussegl dals chantuns è en quest punct suandà il Cussegl naziunal e na vul betg classifitgar la buis d'assagl sco arma scumandada.
En dus auters puncts n'è la Chombra pitschna dentant betg dal medem avis sco la Chombra gronda. Uschia duain tut las parts impurtantas da las buis e da las pistolas vegnir marcadas cun in numer per pudair identifitgar quellas.
Ultra da quai duain be persunas dastgar cumprar gronds magasins da patronas che dastgan er posseder in'arma correspundenta.
Omadus puncts èn tenor la cussegliera federala Simonetta Sommaruga essenzials per betg violar la cunvegna da Schengen. Plinavant ha la ministra da giustia suttastritgà che tiradurs ch'han ina buis d'assagl na stoppian betg temair da stuair dar giu lur arma.
La fatschenta va uss puspè enavos en il Cussegl naziunal. Lez tracta la revisiun da la lescha d'armas lura l'entschatta da l'emna proxima.
RR novitads 12:00