Siglir tar il cuntegn

Header

cuntegn

Lescha da Covid-19 Segund referendum reussescha probablamain

Il segund referendum encunter la lescha da Covid-19 reussescha probablamain. Il comité da referendum ha rimnà gia 60'000 suttascripziuns.

Ils «Amitgs da la Constituziun» han communitgà ch'ins possia parter dal fatg che questas suttascripziuns tanschian per ch'il referendum reusseschia. Els hajan rimnà fin mesemna 61'851 suttascripziuns, sco els scrivan sin lur homepage. I vegnia rimnà vinavant, anc enfin ils 8 da fanadur han els peda.

Societad da duas classas

Ils «Amitgs da la Constituziun», la PPS giuvna ed il comité dal referendum avevan annunzià suenter la votaziun davart la lescha da Covid-19 dals 13 da zercladur ch'i veglian dar en danovamain in referendum encunter las midadas da la lescha. Els èn sur tut encunter l'introducziun d'in certificat da Covid. Tenor els mainian quels ad ina societad da duas classas.

Tar la votaziun dals 13 da zercladur avevan passa 60% dals Svizzers e las Svizras approvà la lescha.

Il Cussegl federal aveva communitgà ier ch'ina votaziun davart il segund referendum da Covid-19 vegnia probablamain ad avair lieu ils 28 da november.

RTR novitads 12:00

Artitgels legids il pli savens