Il Cussegl federal vul scumandar l'organisaziun palestinaisa radical-islamica Hamas cun ina lescha federala. Quai ha il Cussegl federal decidì la mesemna tar sia sesida. Enfin la fin da favrer 2024 duain il Departament federal da giustia e polizia, il Departament da defensiun ed il Departament d'affars exteriurs preschentar in sboz d'ina lescha che duai vegnir preschentà al parlament.
Reacziun sin nova situaziun
Sco ch'il Cussegl federal scriva en ina communicaziun saja el da l'opiniun che quest scumond saja la meglra soluziun per reagir sin la situaziun dapi ils set d'october en il Proxim orient. Cun ina tala lescha survegnissan las autoritads federalas tenor il Cussegl federal ils instruments necessaris per agir cunter eventualas activitads da la Hamas u cunter il sustegn da l'organisaziun en Svizra.
Cussegl federal terminescha collavuraziun cun trais NGOs palestinaisas
Il Cussegl federal ha en pli decidì da terminar la collavuraziun cun trais organisaziuns nunguvernamentalas palestinaisas. Els hajan controllà tar 11 NGOs, ch'èn partenarias per il prgoram da cooperaziun per il Proxim orient. I sa tractia da sis organisaziuns palestinaisas e tschintg organisaziuns israelianas. Tar otg da quellas n'hajan els chattà naginas irregularitads. Tar trais hajan els decis da betg prolungar il contract. Ils nums da las trais organisaziuns palestinaisas ed ils motivs per la terminaziun dal contract n'ha il Cussegl federal betg inditgà.
