I na possia betg esser ch’i vegnia chargià si anc dapli custs a las interpresas – uss ch’i na giaja betg bain cun l’economia en Svizra, uschia Jürg Michel il mainagestiun da l’Uniun d'artisanadi e mastergn. Quai è l’argument principal dals critichers da la nova lescha da radio e televisiun. Mintga interprendider haja en il futur da pajar «Billag», la summa dependia da la svieuta da l’interpresa. Dentant han interpresas cun pliras filialas da pajar bi ina giada.
75% betg pertutgà
Quai saja schon uschia, conceda Martin Candinas, Cusseglier naziunal da la PCD e commember dal comité per la nova lescha. Ins stoppia dentant er vesair che 75% da las interpresas, tut quellas ch’han ina svieuta pli bassa che 500’000 francs, na ston cun la nova lescha insumma betg pli pajar.
Tenor Jürg Michel, dettia quai dentant interpresas che hajan bain ina auta svieuta, sur in mez milliun francs, dentant in pitschen gudogn e quellas pateschian en il futur.
Martin Candinas vesa il problem, quai sajan dentant ma singuls cas. Tenor el na dettia quai dentant mai ina schliaziun ideala per tuts.
Privats profiteschan
Tar ils privats è la situaziun in zic autra. Cun la nova lescha pajan els en il futur pli pauc che fin d'ussa, numnadamain be pli circa 400 francs ad onn, enstagl da 462 francs. Persuenter paja mintga chasada, quai ch'evitescha che persunas consumeschan ils programs da radio e televisiun senza pajar taxa.
Da nov betg da pajar ina taxa han persunas che vivan en chasas da persunas attempadas e da tgira u en chasas da students.