Siglir tar il cuntegn

Header

cuntegn

Svizra Lescha federala n'ademplescha betg empermischuns da No Billag

La lescha federala davart medias electronicas n'adempleschia betg las empermischuns fatgas durant la debatta da No Billag. Da quest avis è la Gruppa svizra per las regiuns da muntogna SAB.

La lescha federala na resguardia betg las premissas da la politica da medias en las regiuns da muntogna e pericliteschia il service public. La SAB pretenda perquai da surlavurar il project, cun resguardar ils basegns da las medias regiunalas a moda prioritara, per garantir ina qualitad da medias en tut las regiuns dal pajais.

Service public patiss

Problem saja che la lescha desistia d'ina purschida da radio e televisiun che cuvra l'entira surfatscha en zonas da provediment definidas en tuttas regiuns. Quai flaivlentia il service public ed i pudess dar inegualitads regiunalas. D'in tal problem fissan sur tut las regiuns muntagnardas pertutgadas, nua ch'i saja en general pli pretensius da realisar purschidas medialas.

Da schlargiar la purschida pia er sin l'online capitass sin donn e cust da la qualitad da provediment en las regiuns. La cumpart da 6% a la taxa da medias duai nov numnadamain betg be valair per la purschida da radio e televisiun mabain era per la purschida online. Uschia avessan radio e televisiun a disposiziun en futur pli paucs meds.

RR novitads 11:00

Artitgels legids il pli savens