En connex cun la revisiun da la lescha davart la planisaziun dal territori ha il Cussegl dals chantuns fatg in pass envers il Cussegl naziunal. Betg perina èn las duas chombras dentant vinavant tar las dumondas co edifizis agriculs ordaifer la zona da bajegiar duain astgar vegnir duvrads e tar las premias per demolir bajetgs.
Anc adina differenzas tranter la chombras
Per ch’edifizis ordaifer la zona da bajegiar che na vegnan betg pli duvrads svaneschan da la cuntrada duain vegnir pajadas premias da demolir. Il Cussegl dals chantuns vul che quellas vegnan er pajadas sch’i vegn remplazzà in bajetg vegl cun in nov. I dettia uschiglio il privel che quels bajetgs vegls restian simplamain e vegnian lura duvrai per autras chaussas.
Il Cussegl naziunal è qua pli strict. La chombra gronda vul era mo pajar talas premias sch’i sa na tracta betg d'in bajetg construì illegalmain. Era savair nagut vul la chombra gronda da la pussaivladad da transfurmar bajetgs agriculs che na vegnan betg pli duvrads en abitaziuns.
Il Cussegl dals chantuns ha gievgia anc ina giada fatg cler ch'el vul lubir quai sut tschertas cundiziuns. Glindesdi tracta ussa anc ina giada il Cussegl naziunal la fatschenta. La finamira da la revisiun da la planisaziun dal territori è da stabilisar il dumber da bajetgs ordaifer la zona da bajegiar.
