Siglir tar il cuntegn

Header

cuntegn

Lètg per tuts Passa 700 pèrs omosexuals han maridà l'onn passà

Durant la segunda mesadad dal 2022 han 749 pèrs omosexuals maridà. 2'234 pèrs han midà lur partenari registrà en ina lètg. Plinavant han ils uffizis civils svizzers registrà dal prim da schaner fin ils 31 da december 2022, 1'171 midadas dal gender. Quai scriva l'Uffizi federal da statistica.

Las cifras provisoricas dal rapport mussan che 53% dals pèrs omosexuals che han maridà, eran umens 47% eran dunnas. Dus terzs da questas lètgs han ins registrà en la regiun enturn Turitg, il Lai da Genevra ed en l'Espace Mittelland. La lètg per tuts è ida en vigur il prim da fanadur 2022.

Tranter il prim da fanadur ed ils 31 da december da l'onn passà, hai plinavant dà 2'234 dumondas per laschar midar uffizialmain il partenadi registrà en ina lètg. 60% (1'337) da las dumondas èn vegnidas da pèrs dad umens. Il partenadi registrà saja stà davent da l'introducziun il 2007, pli populara tar pèrs masculins che tar dunnas.

Umens midan pli savens lur gender

Ils uffizis civils da la Svizra han nudà il 2022 en tut 1'171 midadas dal gender. 53% da las midadas sajan vegnidas fatgas dad um tar dunna. 47% da dunna tar um. Plinavant èn passa la mesadad da las dumondas (622) vegnidas da persunas tranter 15-24 onns. Suenter suondan persunas tranter 25 fin 29 e lura quels tranter 30 fin 34 onns, cun 196 respectivamain 96 dumonda, uschia il BFS.

Dapi il prim da schaner 2022 po mintga persuna ch'abita en Svizra midar ses gender sin il palc administrativ. Tenor il sistem binar en la lescha svizra è la selecziun limitada sin «masculin» e «feminin».

Ord l'archiv

La stad passada è la lètg per tuts ida en vigur en Svizra. Quai suenter ch'il suveran aveva ditg l'atun 2021 cleramain Gea.

video
Suveran svizzer di Gea a «Lètg per tuts»
Or da Telesguard dals 26.09.2021.
laschar ir. Durada: 35 Secundas.

RTR novitads 12:00

Artitgels legids il pli savens