I saja uras che la Svizra fetschia ussa quai pass, di Jon Pult. Per ina Svizra che respectia l'amur e tractia tut ils carstgauns tuttina, di il cusseglier naziunal socialdemocrat.
Impurtant è che sche dus umens u duas dunnas vulan maridar ch’i pon far quai e ch’i han tut ils dretgs e tut ils duairs ch’era las lètgs dad ina dunna ed in um han. Quai è fundamental e quai vegnan ins dad introducir cun quella lescha. Cun quai datti dapli giustia ed i vegn fatg fin cun ina discriminaziun.
Candinas: «I vegn creà novas inegualitads»
Quai vesa Martin Candinas da l'Allianza dal center auter. El disturba cunzunt ch'il Parlament federal haja integrà la donaziun da sem per las dunnas en la lescha. Ins haja empruvà da far endretg a tuts, creeschia uschia dentant gist puspè inegualitads, è el persvas.
Dunnas pon suenter avair ina donaziun da sem, umens na vegnan ad avair nagut. Lez na pon betg avair ina maternitad substitutiva. Dad ina vart datti damain inegualitad e da l’autra vart datti novas.
El sustegnia l'instituziun dal partenadi registrà per pèrs omosexuals e saja dal avis che quai tanschia. Mo sch'ins giaja en quella direcziun e dettia liber tut lura duess ins dar liber endretg. Quai che vegnia fatg gia dapi onns saja ina tactica da salami, cumenzà cun la pussaivladad da l'adopziun da l’uffant da la partenaria u dal partenari.
Per mai èsi uschia che la medischina reproductiva è lura pussaivla sche nus avain ina nunfritgaivladad u malsogna tar um e dunna. Tenor mai duai quai era restar uschia en l’avegnir.
Pult: «I va per dar a tut ils pèrs ils medems dretgs»
Qua ha Jon Pult tut in'autra opiniun. Lubir la maternitad substitutiva era en Svizra saja ina dumonda etica cumplitgada. Betg mo per pèrs dad umens mabain era per pèrs dad um e dunna che na pon betg survegnir sez in uffant. Mo da quella dumonda na decidian nus gnanc en la votaziun davart la lètg per tuts. Ussa giaja mo per la dumonda sche nus dettian a tut ils pèrs ils medems dretgs.
Tschella chaussa è ina dumonda eticamain cumplexa ed jau na sai anc betg tge opiniun ch’jau hai. Ma davart quai na vuschain nus betg. E da dir che quai saja ina tactica da salami n’è betg fitg intelligent. Qua vai mo per avrir la lètg per persunas omo- e bisexualas.
Gea u Na a la lètg per tuts? Ils 26 da settember decidan las votantas ed ils votants a l’urna.