Il Canada sa mussia puspè sco partenari credibel sin plaun internaziunal, ha ditg Leuthard ad ina conferenza dal Cussegl per relaziuns internaziunalas a Montréal (CORIM). La Cussegliera federala Doris Leuthard ha cun quai manegià la midada da la regenza dal conservativ Stephen Harper al liberal Justin Trudeau. Sut Harper aveva il Canada refusà da s’engaschar per la protecziun dal clima.
La Cussegliera federala vul in partenari pli ferm tranter la Svizra ed il Canada per in’economia verda e durabla. Ultra da quai ha Leuthard appellà al Canada d'investir dapli en energia regenerabla. Curt avant aveva Justin Trudeau annunzià al parlament canadais d'introducir in pretsch minimal per CO² a partir dal 2018. Il pretsch pro tonna CO² duai suenter crescher fin ils 2022 sin 50 dollars canadias (CHF 37.-).
RR novitads 07:00