Siglir tar il cuntegn

Header

cuntegn

Svizra Leuthard: «Ina discriminaziun da la Svizra»

Per la cussegliera federala Doris Leuthard è la decisiun da l'UE da renconuscher la bursa Svizra mo per in onn «ina clera discriminaziun da la Svizra».

Il pli impurtant en curt:

  • L'UE ha decidì da renconuscher la bursa svizra mo limitadamain. La renconuschientscha definitiva colliescha ella cun ils progress tar la cunvegna da basa.
  • Per cussegliera federala Doris Leuthard è questa decisiun «ina clera discriminaziun da la Svizra».
  • Per segirar l'abilitad da concurrenza da la Svizra vul il Cussegl federal reagir cun mesiras envers la decisiun da l'UE. El ha incumbensà il departament da finanzas da preschentar propostas la fin schaner.

Cussegliera federala Doris Leuthard è malcuntenta cun la decisiun da Brüssel d'acceptar la bursa Svizra mo limitadamain. La Svizra adempleschia las cundiziuns per la reconuschientscha da la bursa Svizra tant sco auters terz stadis ch'hajan survegnì la reconuschientscha betg limitada. Ins dubitia perquai, sche l'agir da l'UE saja insumma legal.

audio
Saira: Leuthard e dispita cun l'UE pervia da bursa
ord Actualitad dals 18.12.2017.
laschar ir. Durada: 3 minutas 44 Secundas.

Oriundamain aveva la cumissiun da l'UE proponì la reconuschientscha da la bursa Svizra. Ussa vul l'UE colliar la reconuschientscha definitiva da la bursa svizra cun ils progress tar la cunvegna da basa tranter la Svizra e l'UE. Quai ha il vicecumissari da l'UE, Valdis Dombrovskis, confermà. En la cunvegna da basa, ch'è gia dapi 2014 en negoziaziun, vulan Bern e Brüssel fixar co che la Svizra adattescha lur legislaziun a las normas da l’UE che sa midan da temp a temp e sco ch’i è d’agir en cas da dispitas d’interpretaziun.

Contribuziun da coesiun

Avrir la box Serrar la box

Dapi il 2018 sa participescha la Svizra cun 1,302 milliardas a projects per sminuir inegualitads economicas e sozialas en l'UE extendida. Questa summa vegn era numnada contribuziun da coesiun u la milliarda da l'ost.

Mesiras internas cunter la decisiun

Il Cussegl federal ha l'impressiun che la finamira da la decisiun da l'UE saja da diminuir la plazza da finanzas da la Svizra. Per segirar l'abilitad da concurrenza da la Svizra vul il Cussegl federal reagir cun mesiras envers la decisiun da l'UE. El ha incumbensà il departament da finanzas da preschentar propostas la fin schaner. En il center stat l'aboliziun da las taxas da bul.

Quai che pertutga la contribuziun da coesiun resalvia il Cussegl federal da giuditgar da nov la contribuziun.

Per la PPS sto il Cussegl federal sa dasdar

La Partida populara svizra n'è betg cuntenta cun la reacziun dal Cussegl federal. Il Cussegl federal stoppia sa dasdar e prender mesiras encunter la discriminaziun da la Svizra tras l'UE, crititgescha la PPS.

Ella pretenda perquai tranter auter ch'il pajament da coesiun dad 1,3 milliardas saja da renviar e che scadina participaziun voluntaria da la Svizra ad in program da plazzar migrants saja da sistir immediat. Da considerar d'abolir las taxas da bul saja in zap en la dretga direcziun. Dentant na saja betg mo da considerar quai, mabain da concluder quai immediat.

PS: in agir «cuntraproductiv»

Taxas da bul

Avrir la box Serrar la box

Taxas da bul èn taxas che la confederaziun sa pretender sin tscherts documents. Per exempel sin vaglias, sin quittanzas da premias dad assicuranza e sin auters documents dal traffic commerzial.

Er malcuntenta cun la politica dal Cussegl federal è la Partida socialdemocratica, dentant per auters motivs. Ella taxescha la politica sco cacofonia senza plan e finamira. La Svizra dovria ina relaziun fidaivla cun ses vischins, uschiglio dettia il privel d'ina bloccada totala.

Suenter ils eveniments da las davosas emnas na saja betg da smirvegliar sche l'UE perdia la pazienza e prendia sezza mesiras. Per la PS èsi cler: Cusseglier federal da la Partida liberaldemocratica svizra (PLD) stoppia finalmain s'occupar seriusamain cun la cunvegna da basa e preschentar resultats l'entschatta 2018.

L'intent da considerar d'abolir la taxa da bul giuditgescha la PS sco nagut auter ch'in regal da taglia a speculants ed interpresas. Quai na contribueschia betg zichel a la detensiun tranter l'UE e la Svizra.

RR novitads 12:00

Artitgels legids il pli savens