Siglir tar il cuntegn

Svizra Levrat propona fond naziunal per AVS

Per sanar l’AVS ha il schef da la Partida socialdemocratica, Christian Levrat, en mira ina nova funtauna d’entradas: Envers la gasetta «NZZ am Sonntag» propona el da crear in fond naziunal.

Purtret da Christian Levrat.
Legenda: Christian Levrat. Keystone

La rendita da quest fond pudess vegnir dabun a l’AVS. Per exempel pudess la Banca naziunala svizra crear in tal fond. Ins stoppia examinar tge che saja pussaivel senza periclitar l’independenza da la banca naziunala – uschia Levrat.

Levrat ha era rinforzà la posiziun che la PS n'accepta betg ina pli auta vegliadetgna da pensiun per dunnas per pudair sanar l'AVS. I dovria ina nova funtauna per sanar l'AVS. El propona perquai in fond naziuna u in'ulteriur auzament da la taglia sin plivalur u er contribuziuns da paja.

53 milliardas necessarias

Suenter il deal da taglia instradà per l'AVS planisescha il cussegl federal vinavant d'auzar las entradas cun ina taglia sin plivalur pli auta, e d'auzar la vegliadetgna da pensiun da las dunnas. La taglia sin plivalur duai vegnir auzada per 1,5%. La taxa normala giaschess lura tar 9,2%.

L'auzament planisà purtass a l'AVS dal 2021 fin il 2030 supplementar 49 milliardas francs. Necessari fissan radund 53 milliardas sche l'AVS duai cuntegnair anc avunda daners per in entir onn supplementar. Questa largia vul il cussegl federal serrar cun auzar la vegliadetgna da pensiun da las dunnas da 64 sin 65 onns. Quai portia radund 10 milliardas a l'AVS.

RR novitads 09:00