En l'avegnir èn uschenumnadas clausulas da paritad tranter hotels e plattafurmas da reservaziun online scumandadas. Talas clausulas avevan l'effect ch'ils pretschs per stanzas stuevan esser identics sin la pagina web d'in hotel e da plattafurmas da reservaziun online.
Rinforzar la cumpetitivitad
En l'avegnir duain hotels avair la pussaivladad d'offrir agens pretschs sin lur paginas. Sco ch'il Cussegl federal scriva, mida el la Lescha federala cunter la concurrenza illoiala. Il scumond permettia a manaschis d'alloschament sco hotels da promover la distribuziun directa sin lur paginas d'internet e da rinforzar uschia lur cumpetitivitad, scriva il Cussegl federal vinavant.
Quest midament era gia vegnì approvà dal parlament il zercladur da quest onn. Il midament da la lescha vala a partir dal december da quest onn.
