- La cumissaria per dretgs umans da l'ONU, Michelle Bachelet avertescha da las consequenzas negativas per la libertad da pressa, sche Julian Assange vegn extradì als Stadis Unids.
- Quai ha ditg la cumissaria a Genevra suenter in inscunter cun la dunna ed ils advocats dal fundatur da «Wikileaks».
- Assange sa chatta dapi il 2019 en ina praschun d'auta segirtad datiers da Londra.
L'extradiziun potenziala e la persecuziun penala dad Assange possi'avair consequenzas negativas per la libertad da pressa e possia paralisar il schurnalissem investigativ e las activitads da whistleblowers, ha declarà Bachelet.
Suenter ch'el ha passentà bunamain set onns en l'ambassada ecuadoriana a Londra sa chatta Assange mumentan en ina praschun d'auta segirtad datiers da la chapitala da la Gronda Britannia. Entschatta fanadur ha l'Australian da 51 onns appellà cunter la decisiun da la regenza britannica, d'extrader el als Stadis Unids. Là smanatscha ad el in chasti da fin a 175 onns.
Julian Assange aveva publitgà il 2010 sin sia pagina d'internet «Wikileaks» radund 700'000 documents confidenzials, tranter auter en connex cun activitads militaras dals Stadis Unids en l'Irac e l'Afganistan.