Siglir tar il cuntegn
Inhalt

Svizra Lieus pussibels per deponer rument radioactiv

Las 6 dumondas per perfuraziuns da sondagi per deponer rument radioactiv èn la mesemna vegnidas exponidas publicamain en las vischnancas. Quellas sa chattan en la regiun Nördlich Lägern en ils chantuns Argovia e Turitg.

Instrument per far mesiraziuns seismicas 3D sin in prà.
Legenda: Cabels per far mesiraziuns seismicas 3D. Keystone

En las vischnancas Stadel, Weiach, Glattfelden, Eglisau e Bülach planisescha la Societad naziunala per il deposit da ruments radioactivs NAGRA perfuraziuns da sondagi per deponer rument radioactiv. Las dumondas correspundentas èn oz vegnidas exponidas publicamain en las vischnancas. Entaifer 30 dis pon ils pertutgads far recurs cunter ils sondagis.

Tenor l'Uffizi federal d'energia vegnan las lubientschas concedidas il pli baud la fin dal 2018. Sper Nördlich Lägern stattan anc ulteriuras regiuns en discussiun per in eventual deposit atomar final. Cun ina decisiun definitiva vegn quintà pir en 10 onns.

Examinar la structura da la rasada da crappa

Las perfuraziuns pussibiliteschan als geologs da far examinaziuns detagliadas sur da la structura e la consistenza da la rasada da crappa. Uschia pon els evaluar, sch'i fiss insumma pussibel da realisar en in da quels lieus in deposit profund per rument atomar. Gia oravant èsi vegnì fatg in'examinaziun dals lieus cun la metoda da seismica 3D. Cun undas acusticas pon ins uschia tschertgar lieus adattads.

RR novitads 11:00