Siglir tar il cuntegn

Header

audio
Datas da roaming: Quints fitg auts anc adina pussibels
Or da Actualitad dals 25.02.2022.
laschar ir. Durada: 3 minutas 17 Secundas.
cuntegn

Limita da roaming Na datti nagins quints orrents da telefonin pli?

Intgins han forsa gia gì quai eveniment pauc bel. Cura ch'ins turna da las vacanzas a l'exteriur survegnan ins in quint da natel da plirs tschient francs – e quai pervia dals custs da roaming. Cun la midada da l'ordinaziun da telecommunicaziun avant in mez onn han ins vulì impedir exact quai.

Sch'ins telefoneschia ord l'exteriur possian ins anc adina survegnir quints auts – cunzunt tar purschiders da communicaziun sco Sunrise e UPC. Tar la fatschenta Salt na sajan betg mo il custs da telefonia memia auts, mabain era quels da las datas d'internet. Quai di Sara Stadler da la protecziun da consuments envers SRF. Ella n'è anc betg cuntenta cun las midadas fatgas. I na pertutga dentant betg mintgin tuttina.

Contracts novs u gia existents

Sch'in client u ina clienta suttascriva in nov contract per in abunament da natel èsi cler: Lura pon ins fixar sez la limita quant bler ch'ins less maximalmain dar ora per telefonar u datas d'internet en l'exteriur. Tar clients existents ha la Confederaziun dentant decidì ch'ils purschiders da telecommunicaziun pon fixar sez ina limita da standard. E quella è per exempel tar Salt anc adina tar 500 francs.

Nus avain reagì detg spert ed adattà la limita.
Autur: Pascal Grieder schef da Salt

Sbassà da 1'000 sin 500 francs

Tar la protecziun da consuments n'èn ins dentant insumma betg cuntent cun la soluziun da Salt. Bain hajan ins sbassà la limita, ma sch'ins guardia davent da nua, saja quella limita qua anc adina bler memia auta, di Sara Stadler. Salt ha numnadamain sbassà la limita davent da 1'000 sin 500 francs. Tuttina n'è Salt betg pront da sbassar anc pli fitg la limita. Els dian dentant ch'els sa mussian culants tar «accidents». Perquai vali sco clienta u clienta da Salt da reclamar, sch'ins survegn in quint da plirs tschient francs pervia da roaming. La firma da telecommunicaziun vegnia lura para a vegnir encunter cun ils custs.

audio
Uschia pon ins evitar custs memia auts
ord Actualitad dals 25.02.2022.
laschar ir. Durada: 3 minutas 17 Secundas.

Co ins po evitar custs da roaming

Avrir la box Serrar la box
  • Guardar tge abunament da natel ch'ins ha (forsa èn datas d'internet e minutas da telefonar gia cumprendidas per l'exteriur).
  • Controllar la limita da roaming.
  • Betg telefonar sur la rait sch'i na sto betg esser.
  • Far diever dal WLAN en l'hotel u restaurant. Uschia pon ins trametter datas pli grondas sco fotografias u videos. Ins po era telefonar sur l'internet (p.ex. sur Whatsapp u Skype).
  • Gia cumprar ordavant in pachet da datas tar il purschider da telecommunicaziun. Cura ch'ins ha duvrà si quel pon ins cumprar ulteriuras datas u restar senza.
  • Duvrar applicaziuns da cartas che funcziunan era offline. Per exempel
    Navmii GPS, GPS Navigation & Maps – Scout
    u Osmand Karten & Navigation.
  • Tip final: Avair tschentà giu il telefonin uschè bler sco pussaivel. Na spargna betg mo datas da roaming, ins po uschia era giudair (il meglier) las vacanzas.

Midadas tar ils pachets da datas

Era tar ils pachets da datas ch'ins po cumprar per far diever dal telefonin en l'exteriur, hai dà ina midada il fanadur passà. Els ston davent da lura numnadamain esser valaivels per 1 onn e betg mo per 30 dis. Era qua è la fatschenta Salt ida si'atgna via: A l'entschatta era numnadamain mo in dals pachets da datas – in ch'era uschiglio gia fitg chars – valaivels per 1 onn. Pir a partir dal november èn uss era ils auters pachets da Salt valaivels uschè ditg. Qua pon ins pelvair sa dumandar sch'ins ha fatg quella midada pir pli tard, per pudair incassar daners supplementars durant ils mais da vacanzas.

I dettia fatschentas che hajan mess enturn fitg main las midadas da l'ordinaziun da telecommunicaziun:

Ma là nua ch'i dat anc basegn d'agir stain nus vidlonder e ponderain era pass giuridics.
Autur: Sara Stadler protecziun da consuments

Tge che quai munta concret, na vul ella dentant anc betg dir. Pia pon ins dir ch'il problem da roaming è vegnì pli pitschen cun las midadas en l'ordinaziun da telecommunicaziun – dentant svanì n'è quel tuttina anc betg.

RTR actualitad 08:00

Artitgels legids il pli savens

Scrollar a sanestra Scrollar a dretga