- A la staziun da Berna ha in tren ICE chaschunà in disturbi d'ina lingia electrica
- Il traffic da tren sin la axa ost-vest è interrut. Trens crodan or ed i dat retards e sviaments.
- Ord dus trens ch'èn stads airi han 400 persunas stuì vegnir evacuadas.
- Las lavurs da reparatura cuzzan anc fin pli tard la saira.
Il traffic da viafier en la regiun da Berna è dapi il venderdi a bun'ura ferm disturbà. Tranter Wankdorf e la staziun principala da Berna è il traffic sin rodaglias interrut dal tuttafatg.
Chaschunà il disturbi ha in ICE da Basilea ad Interlaken che ha stratg giu vers las 08:30 ina lingia electrica, communitgeschan las Viafiers federalas. En consequenza è sper l'ICE er anc in tren da la S4 vers Thun stà airi. Tranter 300 e 400 persunas han stuì vegnir evacuadas ord ils dus trens. Questa acziun saja ida senza problems e serrada giu, uschia la SBB.
Era ils trens or da l'ost da la Svizra na pon il mument betg ir en la staziun da Berna e quels dal vest na pon betg ir tras la staziun. En la regiun da Berna èsi perquai vinavant da quintar cun gronds retards e trens che crodan ora. Uschia scrodan per exempel la mesadad dals trens tranter Turitg e Berna.
Quant ditg ch'il disturbi cuzza anc n'è actualmain anc betg enconuschent. Las lavurs da reparatura che stoppian vegnir fatgas sajan grondas e quai cuzzia, ha ditg in pledader da la SBB.
Lingia electrica sur plirs binaris
La lingia electrica che il tren ICE ha rut giu giascheva sur plirs binaris. Quella ha l'emprim stuì vegnir rumida davent, avant che las lavurs d'installar ina nova lingia han pudì cumenzar.
Pertge che la lingia electrica è vegnida rutta giu da l'ICE vegn intercurì. La raschun po esser in defect vi dal tren u da la lingia electrica.
