Siglir tar il cuntegn

Header

cuntegn

Lockdown enfin ils 26 d'avrigl Sommaruga: «Las mesiras vegnan prolungadas»

Il Cussegl federal infurmescha oz suentermezdi davart il stan actual en il cumbat cunter il coronavirus. Il cussegl federal ha decis duas mesiras:

  • ll lockdown vegn prolungà enfin ils 26 d'avrigl.
  • Il Departament da sanadad ed ulteriurs departaments han l'incumbensa da planisar pass per pass la sortida dal lockdown.
  • Emprimas schluccadas èn anc planisadas quest mais. Preschentadas vegnan quellas ils 16 d'avrigl.

Tenor la presidenta da la Confederaziun Simonetta Sommaruga vegnan las mesiras da protecziun prolungadas per in'emna enfin ils 26 d'avrigl. Questas mesiras sajan sa cumprovadas ed hajan mussà effect. Dentant na dettia actualmain nagin motiv da schluccar las mesiras da distanza e d'igiena. Sche questas mesiras vegnian vinavant resguardadas, saja pussaivel da schluccar il lockdown pass per pass. Quai adina ensemen cun concepts da protecziun commensurads.

video
Sommaruga: «Las mesiras vegnan prolungadas»
Or da News-Clip dals 08.04.2020.
laschar ir. Durada: 38 Secundas.

Mesiras per part schluccadas l'avrigl

Tenor il minister da sanadad Alain Berset saja la situaziun vinavant seriusa. La prioritad dal Cussegl federal saja vinavant da proteger las persunas periclitadas. Suenter quatter emnas sa sviluppeschia la situaziun a moda favuraivla. I saja dentant vinavant essenzial che la populaziun sa tegnia vid las mesiras da protecziun. I giaja anc emnas enfin ch'i saja pussaivel da turnar a la normalitad.

video
Berset: «La fasa a la normalitad cuzza emnas»
Or da News-Clip dals 08.04.2020.
laschar ir. Durada: 26 Secundas.

Emprimas schluccadas duaja gia dar l'avrigl. Quellas vegnian preschentadas ils 16 d'avrigl. L'emprim stoppian ils secturs puspè vegnir averts che restrenschian la libertad da sa mover il pli fitg; dentant senza che l'epidemia sa derasia puspè. En quest connex haja la reavertura da scolas p.ex. prioritad, occurrenzas grondas però betg.

audio
Cussegl federal prolunghescha lockdown ed annunzia da schluccar
ord Actualitad dals 08.04.2020.
laschar ir. Durada: 5 minutas 39 Secundas.

Crisa profunda per l'economia

Las consequenzas dal virus per l'economia fetschian er quitads. Tut tenor quant ditg che la crisa da corona duria anc, saja pussaivel che la quota da dischoccupaziun s'augmentia a 7%. Actualmain muntia ella a bunamain 3%. 1,5 milliuns persunas en Svizra sajan pertutgadas da lavur curta. I sa tractia dad ina crisa lunga e profunda. Perquai stoppia l'economia vegnir schanegiada.

video
Parmelin: «7% dischoccupaziun pussaivel»
Or da News-Clip dals 08.04.2020.
laschar ir. Durada: 45 Secundas.

Ulteriuras decisiuns dal Cussegl federal:

  • La regenza examinescha da sustegnair l’industria aviatica cun credits transitorics.
  • Grazia a novas mesiras duain 200'000 ulteriurs emploiads pudair profitar da lavur curta. Per persunas independentas na datti dentant anc nagina schliaziun.
  • En connex cun dumondas da locaziun na vul il Cussegl federal betg duvrar il dretg d'urgenza. Locataris e locaturs duain vegnir perina.
  • Ils dazis per rauba medicinala impurtanta vegnan temporarmain sistids.

RTR novitads 17:00

Artitgels legids il pli savens