Ina persuna ha svidà il jackpot da 64,58 milliuns francs. Quai saja la pli auta summa ch'ina persuna singula haja gudagnà en l'entira istorgia da 50 onns dal lotto svizzer, quai communitgescha la societad da lottaria Swisslos. La persuna ch'ha gì la fortuna ha tippà correctamain sis cifras sco er la cifra da cletg.
Ina ulteriura persuna ha tippà correctamain las sis cifras senza cifra da cletg ed uschia gudagnà in milliun francs, scriva Swisslos vinavant. La proxima giada che las cifras vegnan tratgas è proxima emna, lura datti da gudagnar 1,5 milliuns francs.
Co vegnir als daners?
Co che la victura u il victur vegn a ses daners dependia sche la persuna ha giugà online ubain fisicamain lotto:
- Online: Uschia sa Swisslos tgi che la persuna fortunada è, e po prender si contact cun quella e far giu nua che la summa duai vegnir transferida.
- Fisic: En quest cas sto la persuna ch'ha gì las dretgas cifras prender si contact cun Swisslos e purtar la quittanza da gieu cun las cifras correctas. Quai sto capitar aifer sis mais, autramain scada il gudogn.
Ils daners, en quest cas bunamain 65 milliuns francs, stettian a disposiziun immediatamain ha Swisslos infurmà. Quant spert che quels vegnian tar la persuna dependia quant svelt che quella s'annunzia. Sper quai trametta la societad da lottaria er ina broschura da cussegliaziun a la victura u al victur. En emprima lingia cusseglia Swisslos da far en l'emprim mument nagut cun ils daners, quai enfin che l'euforia è tschessada in zic. Plinavant cusseglia la societad da ponderar bain per tge dar or daners ed er da ponderar bain sch'ins vul rumper or da la vita usitada.
Sin il conto vegnan 42,3 milliuns francs
La victura u il victur sto pajar taglia sin la summa da gudogn. L'emprim milliun è liber da taxas, sin 65 milliuns stoi dentant vegnir pajà taglia. A partir dal segund milliun van 35% directamain a l'administraziun da taglia. Uschia che 42,3 milliuns sa tschentan sin il conto da la persuna fortunada. Sper quai sto la summa vegnir declerada en la decleranza da taglia sco entrada – uschia ch'igl è da pajar taglia chantunala e da vischnanca. Ils 35% taglia anticipada pon dentant vegnir restituids a la fin da l'onn.
Tenor il calculatur da taglia da la Confederaziun stuess ina persuna ch'abita a Zug pajar sin questa summa be la mesadad taglia d'ina persuna ch'abitescha a Genevra. Actualmain èsi anc pussaivel ch'ina persuna che fa in tal gudogn po midar domicil ed uschia spargnar in ton da la taglia. Pertge pajà taglia vegn al lieu da domicil ch'ins abitescha la fin da l'onn. Bainprest pudessi dentant esser a fin cun questa pussaivladad. L'onn passà ha il Cussegl dals chantuns approvà ina moziun che scumonda a victuras da lotto da midar lieu da domicil. Uschia stuess il victur pajar là taglia nua ch'el viva il mument dal gudogn.
Or da l'archiv
