Siglir tar il cuntegn
cuntegn

Svizra Luf en il chantun Uri dastga vegnir sajettà

En il chantun Uri dastga vegnir sajettà giu in luf ch'ha probablamain stgarpà passa 30 nursas aifer ultimas 2 emnas. Il directur da segirezza uranais, Beat Arnold, veglia anc oz ordinar ch'il luf vegnia sajettà giu, communitgescha la chanzlia statala.

In luf - probabel l'animal "M35" - fotografà a Bellwald, ils 28 da matg 2013.
Legenda: In luf - probabel l'animal "M35" - fotografà a Bellwald, ils 28 da matg 2013. Keystone

La lubientscha da sajettar il luf è limitada sin 60 dis. Latiers na mundia i betg per in'acziun da chastì cunter il luf, mabain per evitar ulteriurs donns vid animals da niz, uschia la regenza uranaisa.

Il concept uranais per lufs prevesa la lubientscha da sajettar in luf, sch’el stgarpa aifer in mais dapli che 25 animals da niz. Tenor la regenza uranaisa saja quella barriera surpassada en quest cas.

Betg l’emprim’attatga dal luf

L’attatga sin las nursas al cunfin da l’Uri e la Sutsilvania è gia stada la terza aifer 10 dis. Ils 5 da zercladur eran vegnidas stgarpadas 8 nursas ad Emmeten (NW). Ins suppona ch’i sa tractia d’in luf. Il medem animal duai esser stà sin viadi datiers dad Isleten (UR) il di avant. Là duai in automobilist avair fotografà il luf.

RR novitads 14:00