Lukas Engelberger, il president da la Conferenza dals directurs chantunals da sanadad, ha exprimì chapientscha per las pendicularas ed ils territoris da skis. Era sch'el aveva s'exprimì anc l'atun per in obligatori da certificat. El chapeschia la decisiun da las pendicularas da betg nizzegiar il certificat da corona per la proxima stagiun da skis.
Pli impurtant saja la finala la pussaivladad da far controllas, ha Lukas Engelberger manegià envers la «Samstagsrundschau» da radio SRF. Ils territoris da skis che na possian betg far quai – stoppian oramai procurar che la glieud portia mascrina en las cabinas e che l'obligatori da certificat vegnia resguardà en las ustarias.
Plinavant ha el menziunà che las emprimas virolas cunter il coronavirus hajan strusch prendì tiers durant l'emna da virolar naziunala. In augment pli grond n'hajan ins tenor el dentant era betg pudì spetgar.