Tut ils 248 panzers da l'armada svizra, dal tip M113 ston per il mument restar en ils depots. Il scumond da charrar era vegnì enconuschent dumengia. Cun far lavurs da mantegniment hajan ins constatà che la zulla da tracziun pudessi rumper, communitgescha il Departament federal da defensiun VBS il glindesdi. Quai faschess ch'il panzer na fiss ni da guidar ni da franar.
L'organisaziun da la tocca e las reparaturas dovran pli ditg, scriva il VBS. Uschia pertutga il stop da charrar per ils panzers era las scolas da recruta che cumenzan il schaner che vegn.
Remplazzament è planisà
La flotta dad M113 dumbra 248 vehichels ed è dapi passa 50 onns en acziun per l'armada. Il remplazzament da quels saja planisà en differents programs d'armament, ha scrit il VBS.