Il Ramadan è per ils muslims in dals pli impurtants mais en il chalender islamic. Durant las proximas quatter emnas dastgan muslims e muslimas mo mangiar e baiver tranter la levada e la rendida dal sulegl. Dentant, la muntada dal Ramadan è pli profunda.
Schubregiar il corp
La gigina sa mussa era sco ina pussaivladad da schubregiar il corp. Cunquai ch'ins na baivia e maglia nagut durant il di, vegnia la circulaziun dal corp a ralentar. Quai dettia la pussaivladad da sa recrear.
Mo, far gigina n’è betg per tuts. A glieud che la gigina fa grond donn sco per exempel tar glieud che lavura fitg, tar scolars, tar dunnas en speranza ni era tar malsauns n'èsi betg lubì da far gigina. Els han simplamain da prender suenter ils dis. Quai san els per exempel far durant il mais suandant.
El center èn cordialitad e spiert da cuminanza
Il temp da Ramadan è in temp da retratga. Ins sa fatschenta lura pli fitg cun dumondas profundas e fa uraziuns. La fom ch’ins endira da la gigina sensibiliseschia l’atgna empatia e duess regurdar vid ils povers che pateschan. Era sche quai ès in temp da reflexiun interna ès la cuminanza enorm impurtanta.
En connex cun il Ramadan ha la datla ina muntada speziala. Er numnada il «paun dal desert», tutga ella tar las tschaveras da bun'ura e da la saira. Gia il profet Mohammed aveva cusseglià da mangiar datlas durant la gigina. Ellas consistan or da 70% zutger da fritg e fan franc bain suenter in entir di senza mangiativas e bavrondas.