Anna Felder quinta tar las auturas las pli originalas da la Svizra. La mesemna è morta la scriptura tessinaisa en la vegliadetgna dad 85 onns, sco sia figlia ha confermà envers SRF.
Felder n’è betg stada in’autura che ha scrit bler. Ella lascha gist bler temp, ha ella tgirà da dir. L’ovra litterara ch’ella lascha enavos è correspundentamain survesaivla: quatter romans, numerus raquints, plinavant intgins gieus auditivs e tocs da teater.
Ma cudeschs dad Anna Felder fan impressiun: Els porschan ina litteratura, nua ch’ins senta a moda formala la lectura, quant fitg che l’autura ha laschà madirar il linguatg. Là na datti nagut sturn. Nagin pled memia bler. A moda cumplettamain reducida e spretschada sin l’essenzial. Savens è gist quai che na vegn betg tradì, che lascha vegnir visibel il profund e decadent: solitariadad e tristezza gist uschia sco pitschens muments da giudiment, ventira u amur.
Ragischs tessinaisas
Anna Felder è naschida il 1937 a Lugano, sco figlia d’in bab da la Svizra tudestga e d’ina mamma taliana. Ella ha studegià romanistica a Turitg ed a Paris. Suenter la promoziun è ella sa chasada ad Aarau, nua ch’ella ha lavurà decennis a la lunga en in gimnasi sco magistra da talian.
En la vegliadetgna da 30 onns ha ella publitgà ses roman da debut «Quasi Heimweh» davart la sort dals immigrants talians en Svizra. Igl era da lez temp, l’entschatta dals onns 1970, fitg brisant. Il roman «Umzug durch die Katzentür» da l’onn 1975 rapporta d’umans che ston bandunar lur chasa. «Die Adelaiden» da l’onn 2010 raquinta d’in pèr pli vegl al abiss tranter vita e mort.