Siglir tar il cuntegn

Header

purtret da granella giun plaun.
Legenda: La granella ha chaschunà gronds donns sur tut en la Svizra romanda. Keystone
cuntegn

Malauras Donns da passa 200 milliuns

Las malauras ch'i ha dà en Svizra dapi l'emna passada, han chaschunà donns da passa 200 milliuns francs. Millis cas da donns èn vegnids annunziads a las assicuranzas – dapli ch'ils onns passads.

Il pli savens han ins annunzià a las assicuranzas donns vi da vehichels – sco bottas entras granella u perquai che vehichels èn vegnids stratgs cun dad inundaziuns u donns vi da bajetgs. Quai mussa in'enquista da l'agentura da novitads Keystone-SDA.

La Mobiliar quinta suenter in'emprima calculaziun ch'i dat probabel donns da 100 milliuns francs. Enfin uss hajan els survegnì passa 10'000 annunzias da donns. Ma els partian dal fatg che questa summa vegnia anc a sa dublegiar.

La dimensiun dals donns saja fitg gronda, scriva la Mobiliar. Ma i na saja anc betg da cumparegliar cun l'onn da record 2005. Là aveva sulet la Mobiliar nudà donns da 500 milliuns francs.

Svizra romanda pertutgada il pli ferm

La Allianz Suisse quinta cun radund 10'000 cas da donns. Els supponan sur l'entira Svizra donns da radund 32 milliuns francs, 26 milliuns da quai en la Svizra romanda. Quella part dal pajais hajan las malauras tutgà spezialmain ferm. Raschun saja la grondezza da la granella. Ils blers donns han ins annunzià tranter venderdi passà e mesemna.

Per la Allianz Suisse quintan questas malauras tar las pli fermas dapi il 2013. Ils ultims onns ha l'assicuranza en cumparegliaziun gì plitost paucas catastrofas natiralas u donns da granella.

L'Axa suppona fin mesemna radund 15'500 cas. La gronda part pertutgia donns da granella vi dad autos. Vitiers vegnian donns vid chasas u bajetgs en chantuns senza in'assicuranza d'edifizis. Annunzias da donns hajan ins survegnì da l'entira Svizra.

L'Axa quinta cun ina summa da donns da radund 61 milliuns francs. Ils blers donns haja dà il glindesdi nua ch'i haja dà granella sur La-Chaux-de-Fonds ch'è populà ferm. Là sajan radund 7'000 autos vegnids donnegiads.

Er per quell'assicuranza èn tants donns entaifer uschè curt temp insatge extraordinari. Vis sur l'entir onn sajan ils donns enfin uss sur la media, ma ils ultims 10 onns hajan ins nudà il 2012 ed il 2013 anc dapli donns. L'onn n'è dentant anc betg a fin.

Dumengia passada ha la Tagesschau rapportà uschia:

video
Ferms urizis da stad en Svizra
Or da Tagesschau dals 20.06.2021.
laschar ir

RTR novitads 15:00

Artitgels legids il pli savens

Scrollar a sanestra Scrollar a dretga