Siglir tar il cuntegn
purtret da la carta svizra che mussa cotschen la Svizra Centrala, oransch l'entir nord da la Svizra e las regiuns enturn las Prealps, sulet il Vallais ed il nord dal Grischun èn mellen. Il Tessin e las valladas dal Grischun central e dal sid èn verdas.
Legenda: Enfin venderdi saira vala en intginas regiuns in fitg grond privel per malauras entras blera plievgia e perquai ch'ils lais e flums portan gia bler'aua. Enfin 90mm plievgia duai dar en las regiuns da las Prealps. SRF Meteo

Malauras e plievgia permanenta Quai spetga la Svizra ils proxims dis

La ferma plievgia ha chaschunà impediments da traffic, inundaziuns e donns pli gronds u pitschens. En pliras parts da la Svizra èn flums e lais ids sur la riva ora. Il privel d'aua gronda crescha.

  • En il decurs dal venderdi datti dentant pli pauca plievgia, uschia Daniela Schmucki dad SRF Meteo. Cun ferma plievgia sur tut il pajais na stoppian ins betg quintar. Surtut local dettia dentant vinavant urizis.

  • Il privel d'aua gronda, ch'auals van sur ils urs u il privel da bovas resta vinavant. Tranteren po puspè sa mussar il sulegl, sur tut en il sid da las alps. La situaziun sa differenziescha fitg tenor regiun, uschia SRF Meteo.
  • L'aura la fin d'emna vegn in zic pli quieta, fertant ch'i po adina puspè plover en il nord da las alps. En il sid èsi per il pli sitg. Las temperaturas creschan be plaunet, er en il nord pudessi puspè dar dis da stad cun passa 25 grads, en il sid pudessi dar temperaturas d'enfin 30 grads.

Cura sa quietescha la situaziun?

Tenor idrologs dad SRF, duvrassi uss ina fasa sitga da duas emnas. Quai n'è dentant il mument betg en vista. Ma l'emna proxima vegn puspè ina zona da pressiun auta che duess chaschunar almain 3 fin 4 dis sitgs. Quai duess lura almain stabilisar la situaziun cun las auas. Dentant poi suenter puspè dar pli grondas massas d'aua.

RTR novitads 06:00

Artitgels legids il pli savens