En il Tessin ha la regenza appellà da spargnar aua. La plievgia dals ultims dis cun 60 fin 90 mililiters aua haja be gidà a meglierar la situaziun, però betg da schliar il problem da la mancanza d'aua dals ultims mais. Quai declera Stefano Zanini da Meteo Svizra sin dumonda da l'agentura da novitads Keystone SDA.
Actualmain han gia pliras vischnancas tessinaisas prendì mesiras per spargnar aua, per part cun serrar ils begls publics. Quai suenter ch'i aveva dà 40 fin 50 pertschient pli pauc plievgia l'enviern passà. Almain na dettia nagin scumond da far fieu pli en il liber.
Plievgia sur plirs dis fiss meglier
En pli fissi meglier per la natira ed il terren sch'i pluviss in zic durant plirs dis enstagl ina massa durant paucs dis, declera Zanini. A partir da l'autr'emna dettia puspè plirs dis cun bler sulegl e vent dal nordvest. Quai «maglia» puspè davent tut quest'aua.
