Persunas pertutgadas da l'incendi a Crans Montana vegnan tractadas en differents ospitals svizzers ed ospitals da pajais vischins. Ils ospitals da Turitg e Losanna èn spezialisads per arsas severas. Schegea ch'i basegna da principi sang tar talas blessuras, na dettia actualmain naginas stretgas excepziunalas tar l'inventar da sang, di Franziska Kellenberger da la Crusch Cotschna.
Ils ospitals dovran las resursas a moda spargnusa e spostan operaziuns regularas. L'incendi da Crans Montana n’hà uschia actualmain nagin'influenza sin l'inventar da sang.
Tar arsas na dovria per regla naginas transfusiuns grondas, stat scrit sin la pagina da la Crusch Cotschna Svizra. Ma tuttina saja impurtant da donar sang, di Franziska Kellenberger. Durant ils dis da festa dettia pli paucas donaziuns, uschia saja l’inventar da sang l'entschatta da l’onn adina pli pitschen.
Sch’ins è saun, fai senn da donar sang.
Plinavant possia esser che victimas d’arsas, ch’han savens in temp da guariziun pli lung, dovrian pli tard products da sang specifics, sco per exempel corpuls da sang cotschens u plasma. Quels vegnian era obtegniods tar donaziuns regularas.
Infurmaziuns e termins per dar sang datti sin la pagina da la Crusch Cotschna Svizra. En Grischun pon ins donar sang a Cuira e Glion.