En il traffic public n'è l'accessibilitad senza barrieras anc betg realitad. E quai malgrà che quella stuess tenor lescha esser realisada sin la fin da l’onn. Per exempel vegnian fin lura be 60% da las staziuns dal tren ad esser accessiblas per persunas cun impediments. Quai ha communitgà l’Uniun dals transports publics ensemen cun l’Uniun da las citads svizras e quella da las vischnancas.
En il cumbat per l'access senza barrieras saja bain vegnì cuntanschì bler. Per exempel hajan las interpresas da viafier amplifitgà cun preferenza staziuns ferm frequentadas, uschia che 80% da las viagiaturas e dals viagiaturs han profità da las midadas da construcziun. Ulteriuras meglieraziuns sajan però necessarias.
Soluziuns da cumpensaziun per l'onn 2024
Interpresas dal traffic public, chantuns, citads e vischnancas empermettan che persunas cun impediments chattian il 2024 soluziuns da cumpensaziun per tut las staziuns e fermadas che n'èn anc betg vegnidas transfurmadas, per exempel l'agid da persunal a las staziuns.
La lescha davart l’egualitad ad persunas cun impediments è ida en vigur avant 20 onns. La finamira na saja anc betg vegnida cuntanschida pervia dals auts custs d’adattar l’infrastructura, argumentescha il maun public.