Malsauns ston pajar dapli en il futur

Il parlament a Berna vul cunzunt adattar la franschisa la pli bassa da 300 francs regularmain vers ensi. Quai duai succeder mintgamai tenor il svilup dals custs en l’assicuranza da malsauns.

Ils mauns d'in medi e d'ina dunna Bild in Lightbox öffnen.

Legenda da maletgs: In medi en discurs cun ina pazienta (maletg simbolic). Keystone

Il Cussegl naziunal ha sco segunda chombra approvà ina tala moziun, cun 129 cunter 54 vuschs e 3 abstenziuns. Il Cussegl federal ha uschia l’incumbensa d’adattar la lescha davart l'assicuranza da malsauns.

Finamira è da spargnar custs

Questa decisiun ha cunzunt en mira la franschisa la pli bassa da 300 francs, l’uschè numnada franschisa da standard. In augment da questa franschisa duai procurar che persunas malsaunas na giajan betg uschè savens tar il medi per bagatellas. E la tendenza da nizzegiar prestaziuns medicinalas betg necessarias duai vegnir rutta.

I tutga persunas cun entradas plitost bassas

Ina minoritad dal parlament ha dubità che franschisas pli autas mainian a dapli atgna responsabladad. Persuenter chaschunian pli autas franschisas dapli custs per persunas cun entradas bassas e mesaunas.

RR novitads 14:00