Dapi l'entschatta da la pandemia èn damain persunas en Svira s'infectadas cun autras malsognas contagiusas. Tenor l'Uffizi federal per sanadad è il dumber dals cas da malsognas ch'igl è obligatori d'annunziar sa reducì significant e marcant – auter che tar las infecziuns cun FSME ch'èn s'augmentadas, cumpareglià cun il 2019. La reducziun dals cas da novas infecziuns annunziads munta tranter -15% e -90% cumpareglià cun las cefras spetgadas sin basa dal svilup dals onns 2015 fin 2019.
Ina decleraziun pussaivla è tenor l'Uffizi federal da sanadad las mesiras cunter la derasaziun dal coronavirus ch'han eventualmain era impediu la derasaziun da las autras malsognas. Quai tranter auter cun la reducziun dals contacts persunals e las mesiras d'igiena. Imaginabel fissia era che persunas na sajan betg idas tar il medi e na sajan uschia betg vegnidas registradas, conceda il BAG. Quel effect quinta il BAG però ch'el saja pli pitschen.
Jau ma poss imaginar bain che blera glieud lava era en l'avegnir pli savens ils mauns u portan vinavant ina mascrina en il traffic public.
Creschids èn sulettamain ils cas d'infecziun cun la meningocunencefalitis estiva (FSME) – l'inflammaziun dal tscharvè che vegn dada vinavant da raischens.
