Il parlament svizzer vul sa preparar meglier per ulteriuras crisas. La Cumissiun d'instituziuns politicas dal Cussegl naziunal trametta perquai differentas midadas dal dretg parlamentar en consultaziun. Quai ha communitgà il secretariat da la cumissiun. Avant aveva la medema cumissiun dal Cussegl dals chantuns era dà glisch verda a las midadas proponidas.
Pli flexibel, pli ferm, pli effectiv
Sesida pli flexiblas, termins pli stretgs ed organ da manar pli ferm – Quai è las conclusiuns suenter las experientschas mediocras da l'entschatta da la pandemia da corona. Ils instruments actuals duain vegnir applitgads cun dapli effect. La pandemia haja numnadamain mussà gronds devicits, quai che pertutgia l'abilitad d'agir dal parlament en cas da crisas, ha ditg il president da la cumissiun d'instituziuns politicas dal Cussegl Naziunal Marco Romano (AdC).
Nus n'avevan nagina pussaivladad dad agir spert.
Unanim ha la cumissiun deliberà las propostas per la midada dal dretg parlamentar. Tranter auter duai l'Assamblea federala en l'avegnir pudair sa radunar da tut temp – sche necessari era virtual – per che intervenziuns parlamentaras possian vegnir tractadas, decididas ed ir en vigur pli spert. Ultra da quai duai il Cussegl federal en l'avegnir adina stuair suttametter a las cumissiuns parlamentaras in sboz per uschenumnadas ordinaziuns d'urgenza. Il Cussegl federal duai bain era en l'avegnir pudair reger sin basa da dretg d'urgenza, però duai il parlament adina pudair sa far valair.
Far ina sessiun aifer dis
Sch'il parlament approva la midada da lescha proponida, lura po il parlament agir spli spert en futuras pandemias, catastrofas da natira u autras situaziuns da crisa. Ina sessiun extraordinaria fiss danov pussaivla d'organisar aifer in pèr paucs dis. La primavaira 2020 aveva quai durà set emnas. Ina tala pudessan pretender 25% dals commembers dad ina da las chombras parlamentaras, ubain il Cussegl federal.
Las propostas van ussa en consultaziun tar il Cussegl federal – La debatta en il parlament duai cumenzar en la sessiun da primavaira dal Cussegl naziunal.