Ils princips per mesiras da cultivaziun en cas dad ina mancanza d'electricitad èn gia enconuschents. Uss èn las mesiras vegnidas concretisadas e sviluppadas enavant ensemen cun l'economia, ils chantuns ed auters circuls pertutgads. Il Cussegl federal ha uss tramess en consultaziun in sboz d'ordinaziun. Enfin qua saja vegnir fatg bler per garantir ina segirtad d'energia, uschia il Cussegl federal: quai cun reservas da forza idraulica, ovras electricas da gas da reserva u l'auzament dal nivel da tensiun tar la rait da transmissiun.
Sche l'energia vegn tuttina stgarsa vegn prendì successiv mesiras en differents pass tut tenor quant gravanta che la situaziun è. Las mesiras pon era vegnir adattadas tenor quai criteri. La consultaziun cuzza enfin ils 12 da december.
Mesiras en etappas
- Sch'i vegniss tar ina situaziun da mancanza faschess il Cussegl federal en in emprim pass appels da spargnar.
- Vitiers po il Cussegl federal gia decider emprimas restricziuns d'apparats e scumonds. Sco emprim vegniss limità chaussas da confort che dovran energia. Per exempel in scumond da radiaturs electricas mobilas, limita da 40 grads per lavar risti ni in scumond da charrar pli spert che 100 km/h sin las autostradas.
- Sco mesira pli rigurusa dettia lura per consuments pli gronds contingents d'electricitad. Da quests contingents fissan era pertutgadas las pendicularas. Na tanschan las mesiras per spargnar electricitad anc adina betg po il Cussegl federal era decider da serrar las penicularas ed auters indriz dal temp liber sco kinos, teaters ni scumandar occurenzas da sport e da cultura che dovran electricitad.
- En il mender cas, pia sco mesira ultima ratio, fiss previs interrupziuns d'urgenza da la rait per in temp. Questa mesira duai dentant prevegnir in Blackout, pia in collaps nuncontrollà da l'entira rait electrica en Svizra.