En cas d’ina mancanza d’energia l’enviern pudessi er dar contingentaziuns per consuments gronds. Per sa preparar sin in tal scenari duaja bainprest dar in test da stress naziunal. Quai rapporta la «NZZ am Sonntag». Il test vegnia fatg la fin da settember ensemen cun tut ils gestiunaris da la rait da distribuziun, ha ditg Lukas Küng, schef da l’Organisaziun per il provediment da forza electrica en situaziuns extraordinarias.
Dal test da stress duajan ils gestiunaris da las raits calcular per lur clients gronds in contingent da forza electrica fictiv. Uschia duaja tant la prontezza a l’acziun vegnir augmentada sco er ils singuls process vegnir controllads. La data da l’exercizi saja secreta. Contingents dettia mo sch’appels e restricziuns obligatoricas na tanschan betg pli.
