Siglir tar il cuntegn

Header

La preschentaziun grafica sco survista, ch'ils envierns vegnan pli e pli chauds. Dapi 1864 fin 2021/22.
Legenda: Meteo Svizra
cuntegn

Mancanza d'energia Nov bulletin spezialmain per il management d'energia

Per ch'expertas ed experts d'energia hajan in sustegn per pudair quintar quanta energia che vegn duvrada quest enviern per stgaudar, metta Meteo Svizra a disposiziun in bulletin per quels.

Meteo Svizra vul sustegnair la branscha d'energia cun in nov bulletin che sa basa sin infurmaziuns spezialas da l'aura e dal clima. Uschia reagescha Meteo Svizra sin il basegn da la branscha d'energia. La mancanza d'energia che smanatscha, è il factur principal ch'els porschan quest servetsch.

Las datas rimnadas mettan els da nov a disposiziun en spezial per il management d'energia en furma d'in bulletin. Quest bulletin duai gidar la branscha, d'eruir quanta energia che vegn duvrada quest enviern per stgaudar las chasadas. La mancanza d'energia è il factur principal per Meteo Svizra da porscher quest bulletin per l'emprima giada, malgrà che las infurmaziuns eran gia dapi onns avant maun en autra furma.

audio
MeteoSvizra cun nov bulletin per management d'energia
ord Actualitad dals 14.11.2022.
laschar ir. Durada: 2 minutas 45 Secundas.

Cifras, graficas e visualisaziuns

Il bulletin cuntegna bleras infurmaziuns, graficas, cifras, tabellas e visualisaziuns. E quai tut sco sustegn per la branscha d'energia per mussar sch'ins sto spetgar ch'i vegnia duvrà dapli energia ch'ils onns avant.

Intginas graficas mussan sch'i vegn pli chaud u pli fraid che l'onn precedent. Las visualisaziuns cun tut quellas infurmaziuns èn prognostitgadas sur in'emna, sur in mais e fin la fin da mars. Questas indicaziuns èn tendenzas e n'èn betg adina exactas.

Pli lunsch che nus giain en il futur, tant pli grondas vegnan las malsegirezzas.
Autur: Stephan Bader Climatolog Meteo Svizra

Per ch'ils bulletins prognostitgeschian adina uschè exact sco pussaivel, scriva MeteoSvizra mintg'emna in nov bulletin cun datas actualas. Sa basond sin quest pon ils manaschis d'energia quintar cun blera energia che vegn duvrada quest onn pli u main per stgaudar.

Climatologia, tge è quai?

Avrir la box Serrar la box

La climatologia è ina scienza interdisciplinara dals secturs spezials:

  • meteorologia
  • geografia
  • geologia
  • oceanografia
  • fisica

Ella perscrutescha las realitads dal clima, pia il stadi medi da l'atmosfera en in lieu sco er ils process che han in effect sin quel.

Enviern miaivel

Sa basond sin las datas actualas na vesa il climatolog Stephan Bader betg che l'enviern vegn fitg fraid. La tendenza saja plitost ch'i dettia in enviern miaivel, uschia ch'ins stoppia stgaudar damain cumpareglià cun l'onn passà. Quai ha er mussà l'october. Uschè chaud n'è l'october en Svizra anc mai stà. L'energia da stgaudar – ch'è vegnida consumada l'october – è sin il minimum cumpareglià cun ils onns passads.

In bulletin be per experts?

Era sche Meteo Svizra publitgescha ils bulletins da princip per ils spezialists, han tuts access. Tenor Stephan Bader plitost be per guardar e cumparegliar la situaziun da l'onn actual cun ils onns precedents.

RTR actualitad 17:00

Artitgels legids il pli savens

Scrollar a sanestra Scrollar a dretga