Anc n'è betg cler sche quests cas da salmonellas tar uffants derivan propi da products da tschigulatta dal concern per dultschims talian Ferrero. Il mument vegn quai examinà, sco l'Uffizi federal da segirezza alimentara e fatgs veterinars declera.
Ferrero Svizra ha dentant clamà enavos ils products ch'èn vegnids producids en la fabrica entant serrada en Belgia. Tar quests products tutgan per exempel ils ovs da surpraisa ed ils Schokobons. Las autoritads europeicas han entant pudì metter en connex tozzels da cas cun tschigulatta da la firma en Belgia.
Producents da mangiativas èn tenor l'uffizi obligads da prender lur products dal martgà u da clamar enavos quels, en cas che la sanadad dals consuments pudess esser periclitada.
Clamà enavos 40 products
En connex cun las autoritads chantunalas ha Ferrero Svizra clamà enavos radund 40 products che pudessan esser contaminads, sco il biro federal per dumondas da consuments ha communitgà. Gia avant avevan plirs detaglists svizzers prendì or dals regals products da «Kinder» da Ferrero. Tranter auter Coop, Migros, Volg ed Aldi, che han confermà quai.
En Gronda Britannia hai dà fin uss 63 cas d'infecziuns cun salmonellas, en Frantscha 21. 15 da las persunas infectadas en Frantscha han inditgà d'avair mangià products da «Kinder», han las autoritads declerà.