Siglir tar il cuntegn

Svizra Mantegnair Cassis de Dijon

Il Cussegl dals chantuns vul mantegnair il principi «Cassis de Dijon» – era per victualias. Tenor quest principi pon tscherts products producids en pajais da l’Uniun Europeica era vegnir vendids en Svizra. L’idea tar l’introducziun avant 5 onns era da tranter auter da sbassar ils pretschs en Svizra.

Jacques Bourgeois
Legenda: Jacques Bourgeois ha cun si'iniziativa parlamentara lantschà las discussiuns. Keystone
resultat da la votaziun
Legenda: Il resultat da la votaziun davart Cassis de Dijon en il Cussegl dals chantuns. RTR, N.Cadonau

Ina minoritad pretenda da stritgar quest principi per victualias. Surtut represchentants da purs e consuments pretendan ch’ils pretschs na sajan betg sa reducids dapi l’introducziun dal principi «Cassis de Dijon» e ch’ils products da l’UE n’hajan betg la medema qualitad sco products svizzers.

La fatschenta, che va enavos sin in'iniziativa parlamentara da Jacques Bourgeois, cusseglier naziunal da la PLD e maina fatschenta da l'Uniun purila svizra, va uss en il Cussegl naziunal. Lez aveva decidì il matg da stritgar il principi «Cassis de Dijon» per victualias.

Avantatg u dischavantatg per ils consuments?

La dumonda tge ch’il principi «Cassis de Dijon» ha purtà als consuments en Svizra sparta las organisaziuns uffizialas. La protecziun dals consuments da la Svizra tudestga (SKS) beneventa la decisiun dal cussegl dals chantuns da mantegnair il principi «Cassis de Dijon». Suenter 5 onns saja anc memia baud per dir che quest principi haja fatg naufragi, vegn argumentà sin la pagina d’internet. Cun il principi hajan ins anc adina la schanza da cumbatter la Svizra sco insla cun auts pretschs pli auts.

Tut auter tuna quai en Svizra franzosa e Svizra taliana che vulessan stritgar il principi «Cassis de Dijon» – sco il cussegl naziunal. Victualias producidas tenor normas da l’Uniun Europeica n’hajan betg la medema qualitad sco products svizzers, argumentescha l’organisaziun per consuments da la Svizra franzosa (FRC). Ils consuments vegnian cuglianads perquai ch’els na vesian betg che quels products sajan importads.

L’organisaziun da consuments dal Tessin (acsi) fa valair ch’il principi da «Cassis de Dijon» discrimineschia la producziun indigena, perquai ch’ils producents indigens stoppian sa tegnair vida prescripziuns svizras che sajan savens pli rigurusas che quellas da l’Uniun Europeica.

RR novitads 14:00