Siglir tar il cuntegn

Header

cuntegn

Svizra Marcantamain dapli cas da maltractaments d'uffants

En clinicas d'uffants svizras èn vegnids registrads l'onn passà 10% dapli cas da maltractaments d'uffants. Ils delinquents èn per gronda part confamigliars.

L’onn passà èn dapli uffants vegnids maltractads en Svizra. Il dumber da maltractaments segirs e da maltractaments supponids è creschì per 10% sin 1730 cas. Ils delinquents sajan cunzunt confamigliars.

Dus da tschintg uffants sajan vegnids maltractads psichicamain. Mintga quart uffant haja pattì da maltractaments corporals e mintga tschintgavel uffant haja survegnì memia pauca tgira. Quai ha annunzià la gruppa d’experts per la protecziun dals uffants da la Societad svizra per pediatria.

La relaziun tranter mats e mattas è stada pli u main sco l'onn avant – 44% mats e 56% mattas. Mintga sisavel uffant maltractà era pli giuven che 1 onn e 46% dals uffants eran sut 6 onns.

Trais uffants morts pervi da maltractament

Tar ils abus sexuals è il delinquent u la delinquenta stà en 39% dals cas or dal conturn famigliar. Radund mintga sisavel cas d'abus sexual vegn fatg d'ina persuna estra.

Tar mintga tschintgavel uffant, ch'è vegnì sclerì pervi da maltractament era la KESB (autoritad per la protecziun da l'uffant e da creschids) gia ordavant involvida. Tar mintga otgavel uffant era l'autoritad da persecuziun penala gia vegnida activa avant che l'uffant era en la clinica.

L'onn passà èn trais uffants morts pervi da maltractament. Dus d'els èran vegnids maltractads fisicamain ed in ulteriur è najà pervi da negligientscha. Tuts trais uffants eran anc gnanc in onn vegl.

RR novitads 11:00

Artitgels legids il pli savens