Ina turta cun kirsch da Zug sto vegnir da Zug per ch’ella dastga avair num uschia. Da nov vala quai er en l’Uniun europeica. Er las noziuns «Jambon Cru du Valais», pia schambun criv dal Vallais e «Lard Sec du Valais» (charnpiertg dal Vallais) èn da nov protegidas. Quai ha l’Uffizi federal d’agricultura annunzià.
Uschia sa laschian proteger denominaziuns tradiziunalas da products agriculs che vegnan determinads entras la qualitad e la caracteristica da lur derivanza geografica. Uschia sajan uss er quests trais products svizzers protegids en l'UE e na possian betg vegnir copiads. Sco cuntramesira protegia la Svizra radund 77 denominaziuns europeicas sco per exempel «Jambon d'Auvergne».
La decisiun saja ida en vigur il prim da november. Sulet per la «Zuger Kirschtorte» dettia anc in termin transitoric da dus onns.
Protecziun vicendaivla dapi il 2011
Dapi il 1. da december 2011 protegian la Svizra e l'UE viceversa lur denominaziuns d'origin aifer la cunvegna d'agricultura. En total èn 28 denominaziuns svizras protegidas, tranter auter «Bündnerfleisch» u «Tète de Moine». En Svizra èn protegidas radund 1'200 denominaziuns ord ils stadis europeics.