L'emprim saja da cumbatter il coronavirus, lura saja da terrar la lescha da CO2 e cun tutta forza saja da sa dustar cunter il contract da basa cun l'UE.
Sa tegnair vid sistem federalistic
A la radunanza da delegads digitala ha Chiesa ditg che la PPS saja adina s'engaschada per proteger las gruppas da ristg tar il coronavirus. La PPS ha spustà la radunanza fisica a Brig pervia da l'augment da las infecziuns en l'internet.
I saja da sa tegnair vid il sistem federalistic. Ils chantuns na dastgian betg delegar tut a la Confederaziun. Las burgaisas ed ils burgais stoppian agir en l'atgna responsabladad. La medischina na dastgia betg esser pli donnegiusa che la malsogna.
Terrar lescha da CO2 e contract da basa cun UE
La PPS na veglia dentant segir betg viver cun dapli taglias, contribuziuns e scumonds. Perquai sustegnia la PPS era il referendum cunter questa lescha. La Svizra haja gia en il decurs dals davos 10 onns reducì l'emissiun da CO2 per 20% e quai da libra voluntad e grazia investiziuns. Plinavant vegnia la PPS cun tutta forza a dustar cunter il contract da basa cun l'UE. La cunvegna da basa destruiss la Svizra, declera Chiesa. I na saja nagut auter «ch'ina dascusa entrada en l'UE».
