La Tessinaisa Marina Carobbio è nova presidenta dal Cussegl naziunal. L'entschatta da la sessiun d'enviern ha la Chombra gronda elegì la politicra da 52 onns cun 154 da las 172 vuschs valaivlas. Marina Carobbio succedà a Dominique de Buman.
Carobbio è la 24avla politicra da la Partida socialdemocratica che surpiglia quest post e l'otgavla represchentanta dal chantun Tessin. L'ultima represchentanta dal Tessin sin la sutga dal president dal Cussegl naziunal è stada Chiara Simoneschi-Cortesi il 2008/09.
Dapi passa 11 onns en il Cussegl naziunal
Marina Carobbio è dapi 11 onns en il Cussegl naziunal. Il 2007 era ella succedida a Franco Cavalli en il parlament. Er sche Carobbio sesa gia plirs onns en il Cussegl naziunal, ha ella dasperas mantegnì ina vita professiunala normala. Ensemen cun ulteriurs medis parta ella ina pratica a Roveredo en la Val Mesauc. Per il 2019 vegn ella là dentant a prender in congedi.
Sco presidenta dal Cussegl naziunal vul Carobbio surtut s'engaschar per las dumondas da las dunnas e da minoritads.
Heinz Brand segund vicepresident
Emprima vicepresidenta dal Cussegl naziunal daventa Isabelle Moret da la Partida liberaldemocratica dal chantun Vad. E sco segund vicepresident è vegnì elegì il Grischun da la PPS, Heinz Brand. Ils dus vicepresidents sustegnan la presidenta dal cussegl e surpiglian medemamain incumbensas presidialas.
Jean-René Fournier è nov president dal Cussegl dals chantuns
Il politicher da la PCD dal Valais è vegnì elegì da la Chombra pitschna cun 44 da 45 vuschs. Fournier ha 60 onns ed è dapil il 2007 cusseglier dals chantuns. Avant è el stà 12 onns cusseglier guvernativ en il chantun Valais.
Durant ils 12 onns che Fournier è en il Cussegl dals chantuns ha el fatg part da diversas cumissiuns da gronda influenza, uschia da las cumissiuns da la politica da segirezza, da finanzas e da la politica exteriura.
RR novitads 16:00
