Quest onn vulan bleras firmas svizras para augmentar lur persunal. Tenor ina retschertga da la «Sonntagszeitung» vulan 30 dad 89 firmas grondas dumandadas crear novas plazzas da lavur ils proxims mais. Sulettamain 4 prevesan da stritgar plazzas. Las ulteriuras 55 han inditgà da vulair restar tar il dumber da plazzas actual.
Surtut aviatica e detaglists vulan puspè crear plazzas
Cresche il pli fitg vul la spediziun aviatica Swissport ch'ha inditgà da tschertgar 850 novas collavuraturas e collavuraturs. Quai muntass il pli grond augment da plazzas insumma tar la Swissport. Era la firma per il manteniment d'aviuns SR Technics vul crear dapli plazzas ed inditgescha 150. Durant la pandemia da corona cun mesiras encunter la mobilitad aveva la branscha da l'aviatica anc reducì plirs tschients plazzas.
Era dapli plazzas vulan il pli grond producent dad uras dal mund, la Swatch Group, las viafiers federalas SBB, la Posta e tar detaglists. Il pli grond patrun tar ils detaglists, la Migros, ha scrit ora passa 1600 plazzas. Il dumber da plazzas vacantas muntia a 232'825 – quai che munta in stan da record.
Boom tar plazzas temporaras
Firmas d'intermediaziun da persunal constateschian in trend da plazzas temporaras. En tschertas branschas n'hajan betg pli 90% fin 95% dal persunal in contract fix, mabain per part mo in terz. Quai constatescha Yves Schneuwy da l'intermediatur internaziunal Coople vers la «NZZ am Sonntag». Pliras firmas midian model, davent da l'occupaziun prevalentamain fixa vi tar in model en 3 parts cun in team da coc, emploiads flexibels e la terza part da collavuraturas e collavuraturs recrutads a curta vista. Surtut sin aeroports, en la gastronomia e tar detaglists saja quai il cas.
Sindicats crititgeschan quest trend. Lavur temporara ad uschè curta vista na saja nagut auter che transferir il risico da l'interprendider sin ils collavuraturs. Quai di Serge Gnos da la Unia. Ins na dastgia betg prender la pandemia da corona sco stgisa per introducir dapli lavur temporara.