La Confederaziun ed ils chantuns vulan occupar lur plazzas da lavur libras tant sco pussaivel cun persunas indigenas. I va surtut per dar ina schanza sin il martgà da lavur a dischoccupads, pli vegls, persunas che n'han betg ina buna furmaziun e fugitivs.
Confederaziun, chantuns ed ils partenaris socials discurrian davart mesiras pussaivlas, scriva il secretariat da stadi per migraziun. La finamira dals projects saja da rinforzar las forzas da lavur indigenas envers la concurrenza da l'exteriur. Surtut en ina crisa saja impurtant da promover indigens ed indigenas sin il martgà da lavur.