Siglir tar il cuntegn

Header

Bajetg dad GE a Baden.
Legenda: Dapi che General Electric ha surpiglià Alstom èn gia passa 2'500 plazzas vegnidas stritgadas en Svizra. Keystone
cuntegn

Martgà da lavur General Electric stritga damain plazzas che planisà

Enstagl da 450 plazzas stritga il concern american be 200 plazzas da lavur a Baden ed a Birr. Quai tenor communicaziun da General Electric. Ils sindicats discurran dentant da 410 plazzas che vegnian stritgadas.

Il zercladur da quest onn aveva il concern american General Electric GE communitgà plans da stritgar 450 plazzas da lavur a Baden e Birr en il chantun Argovia. Suenter la fasa da consultaziun duain uss mo pli 200 plazzas vegnir stritgadas. Las raschuns sajan: la fluctuaziun natirala, cunvegnas cun terzs e pensiunaments anticipads. Quai ha General Electric communitgà il glindesdi.

Sindicats discurran da tagl radical

Pauc intgantads da la communicaziun da GE èn ils sindicats. En ina communicaziun a las medias numnan Unia e Syna autras cifras. Concret vegnian 410 plazzas stritgadas a Birr ed a Baden. La Unia fa responsabel il Cussegl federal per ils fatgs tar GE. Tar l'acquisiziun dad Alstom entras GE haja il Cussegl federal manchentà da pretender cleras garanzias per ils lieus da producziun svizzers.

Be anc la mesadad da las plazzas

Dapi che GE ha surpiglià il 2015 il sectur dad implants electrics dad Alstom, èn vegnidas stritgadas èn il chantun Argovia passa 2'500 plazzas da lavur. Uschia è la firma be anc mez uschè gronda sco avant l'acquisiziun.

Sco emprim hai dà il 2016 ina reducziun da radund 900 plazzas da lavur. Il 2017 è suandà il proxim tagl. Quella giada vuleva il concern da las total anc 4'500 plazzas da lavur en Svizra, stritgar 1'400. Suenter ina fasa da consultaziun cun ils represchentants dals lavurants eran ins sa cunvegnids da stritgar il pli dal tut 1'200 plazzas da lavur.

Ord l'archiv:

Il zercladur da quest onn aveva il concern american General Electric annunzià da vulair stritgar ulteriuras 450 plazzas da lavur als lieus da producziun Baden e Birr.

Video
Nova reducziun da plazzas tar GE en l'Argovia
Or da Schweiz aktuell dals 17.06.2019.
laschar ir

RR novitads 14:00