Mintga terza persuna che lavura en Svizra ha gì il 2020 50 onns e dapli. Questa cumpart è crescida marcantamain ils ultims onns, sco las ultimas cifras da l'Uffizi da statistica BFS mussan.
La raschun è tenor l'uffizi che la generaziun dals babyboomers cun las annadas 1945 fin 1964, haja cuntanschì la vegliadetgna da 50 onns. Uschia lavuravan l'onn passà dapli che 80% da las persunas tranter 50 e 64 onns. L'onn 1991 eran quai cnap sur 70%. Quai haja er da far cun il fatg che dapli dunnas pli vglias lavurian ozendi che anc avant 30 onns.
Cumpareglià cun auters pajais europeics ha la Svizra ensemen cun la Svezia, l'Islanda e l'Estonia la pli gronda cumpart da persunas sur 50 onns che lavuran. E tge che dat er en egl: Tar las persunas pli veglias che lavuran, èn il mument pli paucas a la tschertga da lavur che tar persunas pli giuvnas, tranter 25 e 49 onns.
