Hotels e locaturs da abitaziuns da vacanzas duain dastgar far offertas favuraivlas sin lur paginas d'internet – en spezial era anc pli favuraivlas che quai che las plattafurmas da cudeschaziuns fan. Il Cussegl naziunal ha perquai approvà cun 109:70 vuschs (13 abstenziuns) da scumandar clauslas che lian il pretsch en contracts da las plattafurmas cun hotelieras e locaturs dad abitaziuns da vacanzas.
Talas plattafurmas sco per exempel Booking.com, Expedia ni HRS, che rimnan, offreschan e vendan viadis e pernottaziuns, pretendan numnadamain dals hotels e locaturs ch'i na dastgan betg far offertas pli bunmartgadas sin lur pagina d'internet che quellas sin la plattafurma. Tals contracts ston ils hotels ed ils ed locaturs dad abitaziuns da vacanzas suttascriver, sch'i vulan che lur offerta cumparia sin las plattafurmas.
PPS, PLD e Verd-liberlas: Il martgà duai reglar
En la debatta en il Cussegl naziunal han argumentà la PPS, la PLD ed ils Verd-liberals ch'il martgà regleschia quai tut da sez. Nagin stoppia per forza esser sin quellas plattafurmas. Mo i na possia betg esser che quellas porschian lur servetsch gratuit. Senza talas clausulas maldovrian ils hotels ed ils locaturs dad abitaziuns da vacanzas las plattafurmas per far reclama e suenter giajan ils clients a cudeschar sin la pagina d’internet da l’hotel e dals locaturs, nua che la medema stanza ni abitaziun saja pli favuraivla.
Ultra da quai procurian las plattafurmas per transparenza. Tar ellas possia mintg'in cumparegliar ils hotels e las abitaziuns e las cundiziuns. Quai animeschia il martgà e procuria per ina sauna concurrenza. Da quai profiteschian la fin finala era ils clients.
PS, Verds ed AdC: Reglar, sco ils stadis vischins fan era
Il cudeschar online vegnia adina pli impurtant. Tenor in studi da la Scola auta spezialisada da la Svizra franzosa vegnan prest in terz da tuttas stanzas ed abitaziuns cudeschadas via las plattafurmas. E strusch in hotel, cunzunt ils pitschens e mesauns, possia sa lubir da betg esser preschent sin quellas. Gratuit na saja quai era betg. Sch'ina stanza ni ina abitaziun da vacanzas vegn cudeschada dad in giast, lura pretendian las plattafurmas ina cumissiun da fin 15%.
Tenor il studi menziunà han hotels svizzers pajà a las plattafurmas passa 130 milliuns francs l'onn passà. Che quai saja in problem per il martgà han ils pajais vischins gia remartgà, e scumandà talas clausulas. Sche la Svizra na fetschia betg il medem, lura saja quai in dischavantatg, ha argumentà la PS, ils Verds ed era l'Allianza dal Center.
La fatschenta va ussa en ils cussegl dals chantuns.