Siglir tar il cuntegn

Header

martin candinas
Legenda: Il cusseglier naziunal Martin Candinas la vul betg propi ora cun la puma: Però conferma el da "ponderar" ina candidatura. Keystone
cuntegn

Svizra Martin Candinas ponderescha candidatura per presidi PCD Svizra

Il carussel da candidats a Berna gira puspè. Questa giada vai per il successur da Christophe Darbellay, il president da la PCD, che banduna suenter 9 onns il timun da la partida naziunala. Tranter ils nums che curseschan è il Cusseglier naziunal grischun Martin Candinas.

Il mument na vul Martin Candinas dentant anc betg vegnir ora cun la puma. I dettia ina cumissiun che saja vidlonder da tschertgar candidatas e candidats adattads per il presidi da la partida. Lemprim duai questa cumissiun far sia lavur, avant ch'i vegn gia tschintschà da pussaivels candidats, ha ditg Candinas.

Betg decider a la sperta

Candinas conceda dentant ch'el fetschia ses patratgs e pondereschia, sch'el veglia candidar. Ina tala decisiun na possian ins betg simplamain prender uschia a la sperta, manegia el. Fatg saja ch'ina tala decisiun avessia consequenzas per la vita privata ed il mintgadi da lavur, di Candinas.

Auters annunzian gia interess

Gia annunzià interess ha il Cusseglier naziunal Gerhard Pfister da Zug. Lantschar sia candidatura vul il politicher da 53 onns - che politisescha a l'ala dretga da la partida - dentant pir a l'inscunter da Bavania da sia partida chantunala.

Schanzas intactas per Candinas

Sia candidatura è dentant pulit contestada. Per blers collegas da partida èn sias posiziuns datiers da la PLD e la PPS in problem. Els teman ch'ina partida sut il timun da Pfister pudessia ruschnar a la dretga, ed uschia starmentar electurs dals centers urbans. Martin Candinas, che politisescha a l'ala socialliberala da la PCD, fussi la meglra alternativa, dian els.

Anc han ils candidats dentant temps. La cumissiun vul preschentar sia glista da candidats il favrer. Il president nov duai lu la radunanza da delegads eleger l'avrigl.

RR Actualitad mezdi 11:00

L'entschatta schaner 2016 ha laschà savair Martin Candinas ch’el vegnia a decider enfin la fin da schaner 2016, sch’el vegli candidar.

Artitgels legids il pli savens

Scrollar a sanestra Scrollar a dretga