Siglir tar il cuntegn

Header

Ins vesa in maun dad in bab che tegn in pop en bratsch
Legenda: Babs duain survegnir duas emnas congedi da paternitad Reuters
cuntegn

Svizra Martin Candinas vul in congedi da paternitad da duas emnas

Il Cusseglier naziunal grischun ha lantschà in'iniziativa che pretenda duas emnas congedi per babs.

Sco bab da trais uffants haja el sez fatg l'experientscha quant impurtant ch'i saja da pudair esser a chasa ils emprims di suenter la naschientscha d'in uffant, di Martin Candinas. El sez haja gì fortuna. Ses patrun haja lubì ad el, sin basa voluntaria, duas emnas congedi da paternitad.

Pretensiun da Candinas senza grondas schanzas

Tenor lescha survegn in bab ozendi sulettamain in di congedi da paternitad, pia precis uschè ditg sco per bardigliar. La pretensiun da lubir duas emnas congedi a babs novnaschids n'ha il mument betg grondas schanzas en il parlament. Entant che la cumissiun per segirezza sociala e sanadad dal Cussegl naziunal aveva anc approvà l'iniziativa l'avrigl passà, n'ha la cumissiun dal Cussegl naziunal betg pli approvà l'iniziativa il november. Dapi las elecziuns dals 18 d'october è il parlament numnadamain daventà pli conservativ. Nadja Pieren dal PPS di: «In congedi da paternitad fiss memia char e faschess donn a l'economia.»

Duas emnas, ma betg gratuit

Er Martin Candinas sa ch'ins na survegniss betg gratuitamain duas emnas congedi da paternitad. La realisaziun da sia idea custass radund 200 milliuns francs. Ella vegniss finanziada solidariamain dals emploiads e dals patruns e pajada sur l'urden da cumpensaziun dal gudogn. Il congedi da paternitad vegniss pia finanzià e reglamentà precis tuttina sco il congedi da maternitad.

Duas emnas congedi da paternitad èn realisticas e finanziablas.

Martin Candinas na vesa betg in problem en la realisaziun da sia proposta. Er represchentants da la sanestra avessan gugent dapli. Cedrik Wermuth è daventà bab avant in pèr mais. Per el èsi dentant cler dapi daditg ch'i è temp per ina midada. El sustegn perquai la proposta da Candinas, ma cun resalvas. Duas emnas sajan numnadamain memia pauc, di el. El s'engascha per in congedi per geniturs tenor il model scandinav, pia in congedi da plirs mais per babs e mammas, che po vegnir retratg er sparpaglià sur plirs onns ubain en furma d'in pensum reducì.

Savend cha quest'idea n’ha actualmain politicamain nagina schanza a Berna, spetga e sustegna Cedirk Wermuth dal PS l'iniziativa cha Travail.suisse vul lantschar l'avrigl da quest onn. Quella pretenda 4 emnas congedi da paternitad.
«La politica Svizra saja ina dals pass pitschens», di Wermuth.

Artitgels legids il pli savens

Scrollar a sanestra Scrollar a dretga