La Svizra ha exportà il 2021 material da guerra en 67 pajais. Sco il Secretariat da stadi per l'economia Seco scriva, saja la blera rauba ida a la Germania (123 milliuns francs), al Danemarc (96 milliuns francs) ed als Stadis Unids (90 milliuns francs). Var dus terzs dals exports han cumprà pajais europeics.
40% dals exports èn stads chars armads, suandà da muniziun cun 25%. Quai ha communitgà il Seco. S'augmentads èn ils exports da material militar spezial, sco apparats per mesirar distanzas, equipament da protecziun e cameras termicas.
Valur agiuntada sur 1,2 milliardas francs
Or da la dumonda per rauba d’armament resulta en Svizra ina valur agiuntada da 1,256 milliardas francs. Colliads cun questa valur agiuntada èn radund 7’600 plazzas da lavur. Questas cifras han perscrutaders da BAK Economics evaluà, sin incumbensa dal Secretariat da stadi per l'economia Seco.
En cumparegliaziun ha la branscha da finanzas svizra cuntanschì il 2020 ina valur agiuntada da 95,5 milliardas francs. E 430’600 plazzas da lavur èn colliadas cun la branscha, tenor in auter studi da BAK Economics dal november 2021.