Tenor la polizia chantunala dal Vallais ha ina guida da muntogna e ses giast pers la vita sin il Matterhorn. In grip rut giu haja prendì ils dus alpinists cun el. La crudada è capitada ier enturn las 9 la damaun sin var 4'250 meters autezza.
Oz la damaun han ins chattà ils morts. Ier è l'acziun da salvament vegnida interrutta pervia da privel da crappa. Las duas unfrendas n’èn anc betg vegnidas identifitgadas.
RR novitads 06:00