Il World Economic Forum (WEF) cuntentia dapi onns il basegn da dialog, ha Ueli Maurer ditg a Tavau en ses pled d'avertura. Impurtant saja il dialog tranter las elitas e la populaziun. La Svizra saja perquai in bun exempel cun ses sistem da democrazia directa.
En pli ha Maurer fatg attent che la Svizra saja ina economia publica ed ha accentuà l'impurtanza dal commerzi liber e la libertad da manifestar l'atgna opiniun. Il president da la Confederaziun ha intimà ils preschents da furmar il futur cuminaivlamain sin basa da «nossas valurs».
Ueli Maurer vul al WEF tranter auter discutar cun represchentants da l'Uniun europeica davart la cunvegna da basa. Accumpagnà vegn il president da la Confederaziun al WEF dal minister da l'intern, Alain Berset, dal minister da l'extern, Ignazio Cassis sco er dal nov minister d'economia, Guy Parmelin.
RR actualitad 12:00